Jedite više barene ili grilovane ribe, kuvana jaja (dva puta nedjeljno sa žumancetom ili svaki dan bjelance), kiselo mlijeko, jagode, trešnje, zelenu salatu…
Konačno je došlo toplo vrijeme, a na visokim temperaturama organizmu najviše prijaju voće i svježe povrće, bogato nutrijentima koje tijelo pune energijom. Zato je sada pravo vrijeme za detoksikaciju.
Prije svega ograničite unos hljeba, šećera i izbjegavajte kafu, slatkiše, gazirane napitke, alkohol, masnu, prženu i konzerviranu hranu. Jedite više barene ili grilovane ribe, kuvana jaja (dva puta nedjeljno sa žumancetom ili svaki dan bjelance), kiselo mlijeko, jagode, trešnje, zelenu salatu, mladi luk, rotkvice, špinat, zelje, tikvice, brokoli, krastavac, karfiol, cijele žitarice, orašaste plodove (posebno badem), jabukovo sirće, maslinovo ulje, sjemenke suncokreta i lana, svjež đumbir.
Da biste ljeto dočekali u top formi, svaki dan, a najmanje tri puta nedjeljno, odvojite tri minuta za tri vježbe koje brzo i efikasno “podižu” zadnjicu i zatežu noge. Možete ih raditi kod kuće, na poslu, u parku, potrebna je samo dobra volja i već poslije 15 dana primjetićete efekat.
JELOVNIK PO SATU (PRIMJER)
8:00 Čaša tople vode sa limunom ili šumećom tabletom vitamina C
8:30 Ovsene pahuljice (50 g) sa kiselim mlijekom i kuvano jaje
10:00 Čaša vode ili šolja biljnog čaja
11:00 Salata od sirovog povrća (150 g), obarena smeđa riža ili proso (50 g)
12:00 Čaša vode ili šolja biljnog čaja
13:00 Grilovano povrće (150 g) i riba na žaru (100g)
14:00 Čaša vode ili biljnog čaja
16:00 Sarmice od zelja punjene smeđom rižom ili šaka badema
17:00 Čorba od tikvica, brokolija ili karfiola ili salata posuta sjemenkama lana, suncokreta ili svježe narendanim đumbirom
20:00 Salata od sirovog povrća (zelena salata, paradajz, tikvice, mladi luk, rotkvice) posuta sjemenkama suncokreta i lana)
Ako se pridržavate ovog načina ishrane sedam dana, trebalo bi da izgubite oko četiri kilograma. Obroke možete da kombinujete po ukusu, a satnicu prilagodite vašem dnevnom rasporedu. Preliv za salatu pravite od prstohvata himalajske soli, 1/2 kašičice susamovog ulja i jabukovog sirćeta. Prije svakog obroka, popijte čašu vode ili čaja (nana, kamilica, žalfija, ehinacea, zeleni). Ne jedite poslije 21 sat i nemojte kasno da idete na spavanje.
MINUT ZA SVAKU VJEŽBU
Možda prvih dana neće djelovati lako, ali ove vježbe su vrlo jednostavne i efektne. Za svaku je potreban samo minut, u pitanju su varijacije čučnjeva koji aktiviraju mišiće nogu i zadnjice.
1. Noge su raširene, malo više od širine ramena, a stopala i koljena blago okrenuta u stranu. Savijte koljena sve dok butine ne budu paralelne sa podom, pa se podignite u početni položaj. Pazite da leđa budu prava i da je težina tijela na petama, a ruke podižite dok se spuštate u čučanj.
2. Razmaknite noge malo više od širine ramena, ruke opustite sa strane ili ih stavite iza glave. Spuštajte se u čučanj sve dok koljena ne budu savijena pod uglom od 90 stepeni. Prilikom dizanja, skočite najviše što možete i ponovo se dočekajte u čučanj.
3. Ispravite leđa, stopala su u širini ramena, ruke stavite na kukove. Zakoračite napred tako da se stopalo druge noge podiže od tla. Spustite se u čučanj da koljeno ispružene noge bude paralelno sa podom. Podignite se zadržavajući težinu tijela na prednjoj nozi. Zatim ponovite vježbu sa drugom nogom. (Novosti)
